打打下變咗長文... 唔Edit錯別字，冇心機。
～～
老細今日帶咗兩位經理，山長水遠過黎話要開會。次次都係人哋臨收工先至嚟。仲要嚟到之後，三條友好似10年冇見過咁，自己講啲唔關我哋嘅公事先。我就企左係出邊護士站到等佢哋。終於成功阻住到我哋收工，先至話開始開會。
一個30分鐘嘅會，用咗20分鐘黎講我（哋）啲Customer Service要做得好啲。最近俾人投訴得多係我。呀可樂同事係超級好人，所以冇俾人投訴。放產假姑娘2今日第二日返工，又唔關佢事。你三條友阻左我20分鐘冇錢嘅OT時間，就係叫我做好啲Customer Service？你之前咪打個兩個電話黎同我講囉！？有冇需要過嚟扮開會再講呢？我覺得阻住咗我其他同事收工，唔係咁好意思。你要過黎小我，唔使咁大陣仗。
個會句句都頂心頂肺，超級Ung耳。佢話我哋要將心比己，人哋已經好唔舒服入嚟。我哋要對佢好啲。同埋雖然好多人呃假紙，但係如果佢哋講中晒啲要點，我哋都可能要俾佢。（咁係咪即係我可以賣假紙？你會唔會畀返回佣我？）
另外佢話我哋要學做麥當當，要好全面同埋有微笑地俾最好嘅服務我哋嘅客人。經理好風趣咁話，哎呀你哋戴口罩架！不過都應該能夠睇到你哋嘅笑容掛？哈哈！
姑娘2發現我已經坐到硬晒呔。我專登帶咗個口罩，因為我個下巴已經跌出嚟。同埋要遮住我燶度出煙嘅黑面。我想講我係賣專業知識唔係買笑。如果我要拋個身出來做，我份人工應該高好多。同埋老細，你貼地啲，你幾耐冇去過麥當當？你幾何見啲後生仔女收銀有笑容？你試吓同佢地講要兩包茄汁！？睇吓佢問唔問侯你？
仲有，好唔鍾意我經理私自喺個會度，當住咁多人問候我阿媽。你又知我同其他同事講咗？
你帶咗個新經理上嚟，佢supposedly係一定唔知。你咁樣咩意思？上次佢私自同我老細講咗，我都未同佢計。原來做佢員工係唔可以有私隱嘅。Gossip花生就係佢哋喺Office嘅茶餘飯後話題。點解我阿媽啲嘢要全世界都知呢？
～～～
今日我又俾人投訴。應該慶幸呢單野係開會之後發生。唔係20分鐘都會變40分鐘。今日冇照肺因為我唔肯聽我老細電話，吹呀？
西客到到都有。我唔係介意西客覺得我好定唔好。因為佢下次一定唔會再搵返我。我有我自己嘅fans ，我已經覺得足夠。我介意嘅係老細同經理，佢哋永遠都係信病人亂吹嘅唔合理冇邏輯嘅投訴。
故仔作晒兩張A4紙，我真係好佩服佢。同埋想同個客講，唔好咁掛住我，我唔值得你等左兩個半月之後，先至鼓起勇氣去寫呢封投訴信。因為我已經唔記得你係邊個。你淨係黎過一次。你個名同你個樣，同嗰日發生乜嘢我完全冇印象。但係我好肯定我冇做過你口中所講嘅你敲門入咗嚟，我Fing隻手叫你出返去。跟住你企喺出邊6分鐘唔知做乜嘢。大佬，我後面有客架 ！我叫你等6分鐘做咩嘢呀？同埋啲客通常係入到黎，我同佢開始傾下，我先至覺得佢無理取鬧。我冇X光眼，我唔會喺你入嚟嗰刻望一眼就知道你係痴線。所以我唔會喺你入門口個刻就玩你。我未去到咁勁！
你第一句已經唔Make sense ，之後嗰啲我都費事講。笑壞人個嘴。當然，我老細應該係會信。
D病人鍾意你，好少會寫信讚你。就算寫夠100封信，都抵唔住一封投訴信。我老細貴人事忙，邊會知我係一個點樣樣嘅人。但係佢就會從呢啲無理嘅投訴信，慢慢對我建立一個歪曲嘅專業形象。呢個係我最介意嘅。所以其實，就算西客度度都有。我會希望可以搵到一個正常啲嘅老闆去一齊撐我。我都知喺私人市場係唔存在一個咁樣嘅老闆。所以我雖然有去見下工，但係我仲未搵到一份我想轉嘅工。
http://hk.on.cc/…/bkn-20180412132205895-0412_00822_001.html…
～～
呀叔叔睇完我就攞呢四個蘋果送俾我。我話既然你個袋咁重，我就幫你食咗佢哈哈。佢話同老婆去台中想買手信俾我。我好厚顏無恥同佢講我乜嘢都食。仲有病人鍚我，真係好😭😭😭😭😭
Search